Youtube/Tezkije
Fetva
Aktualitete
Libra
Kapitulli i dytë: Referencat e legjislacionit të fesë islame
Dr. Muhamed el Hamed
 25.05.2022

Hyrje

Kurani dhe Suneti janë dy referencat e legjislacionit të fesë islame; prej tyre nxirren besimet, legjislacionet, dispozitat, edukata etj.
 
Në trajtesat e mëposhtme do të mundohemi t’i sqarojmë këto më hollësisht duke sqaruar nocionet Kuran, Sunet, argumentet që dëshmojnë faktin se ato janë referenca, si dhe çështje të tjera që ndërlidhen me këtë temë.

Trajtesa e parë: Esenca e Kuranit dhe vërtetësia e tij

1.       Përkufizimi i Kuranit nga ana leksikore. Një pjesë e dijetarëve të gjuhës janë të mendimit se fjala Kuran është ndërtuar nga folja lexoj (kara’e), pjesorja lexuar (kiraetu), që ka kuptimin e leximit.
 
Disa të tjerë mendojnë se Kurani është emër i përveçëm, i pamotivueshëm, i parmë. Pra, nuk është marrë nga folja kara’a, porse është emër i përveçëm i Librit të Allahut, sikurse emrat e librave të tjerë qiellorë: Ungjilli dhe Teurati.
 
Ndërkaq, disa të tjerë kanë thënë: Kuptimi i fjalës Kuran është mbledhës. Pra, është quajtur Kuran, sepse mbledh dhe grumbullon suret.
 
2.      Përkufizimi i Kuranit nga aspekti fetar. Dijetarët kanë dhënë përkufizime të shumta për Kuranin, porse më përmbledhësi dhe më i miri ndër ta është: “Kurani është ligjërimi i paimitueshëm i Allahut, i cili i është shpallur Muhamedit ﷺ, përcjellë prej tij masivisht, leximi i të cilit është adhurim.”
 
“Ligjërimi i paimitueshëm i Allahut”: domethënë, ai nuk është ligjërim njerëzish, xhinësh, engjëjsh e as profetësh, por është fjalë e Allahut, të cilën Ai e ka folur realisht, ashtu siç i takon madhërisë së Tij.
 
“... i cili i është i shpallur Muhamedit...”: në këtë pjesë përkufizimi përjashtohen librat e tjerë zbritur të dërguarve përpara Muhamedit ﷺ, si: Fletushkat e Ibrahimit, Teurati, zbritur Musait, dhe Ungjilli, zbritur Isait (paqja e Zotit qoftë mbi ta!).
 
“... përcjellë prej tij masivisht...”: në këtë pjesë përjashtohet ajo që është pretenduar se është Kuran, që nuk është përcjellë masivisht.
 
“... leximi i të cilit është adhurim”: kjo përjashton hadithin kudsij, sepse leximi i tij nuk është adhurim më vete, edhe pse është fjalë që i atribuohet Allahut të Lartësuar.
 
3.      Emrat e Kuranit fisnik. Allahu i Lartësuar e ka emërtuar Kuranin fisnik me emra të shumtë, të cilët e kalojnë numrin pesëdhjetë, por që më të njohurit janë të mëposhtmit:
 
Libri, sepse ai në vetvete mbledh histori, mrekulli, legjislacione dhe informacione që kanë ardhur për shkaqe të caktuara.
 
Rikujtimi, sepse ai përmban këshillim, qortim dhe të dhëna për popujt e shkuar, si dhe ngaqë ai dhuron krenari dhe lavdi për këdo që e merr për të vërtetë dhe beson në ajetet e tij. Po ashtu, ai është dallues mes së vërtetës dhe së kotës.
 
Vërtetësia, vlera dhe ruajtja e Kuranit nga ndryshimet
 
Kurani është libri i fundit qiellor dhe përmbyllësi i tyre, është më i gjati, më përmbledhësi dhe gjykues për ta.
 
Allahu thotë në Kuran: “Ne të kemi zbritur ty (o Muhamed) Librin me të vërtetën, si përmbushës të shkrimeve të mëparshme dhe mbrojtës të tyre.” (El Maide, 48)
 
Në një ajet tjetër thotë: “Ky Kuran është i tillë që nuk mund të bëhet prej dikujt tjetër veç Allahut, por është vërtetues i shpalljeve të mëparshme dhe shpjegues i Ligjit (për njerëzit) dhe, pa dyshim, është zbritur nga Zoti i botëve!” (Junus, 37)
 
Ndërkaq, në një tjetër ajet thotë: “Në tregimet e atyre (të dërguarve) ka këshilla për ata që janë me mend. Ky (Kuran) nuk është tregim i trilluar, por është vërtetues i atyre (librave) që janë shpallur para tij, është shpjegues i çdo gjëje dhe udhërrëfyes e mëshirë për njerëzit besimtarë.” (Jusuf, 111)
 
Komentuesit e Kuranit, në lidhje me fjalën: “... dhe mbizotërues ndaj tyre”, kanë thënë: “Dëshmitar për librat përpara tij dhe vërtetues i tyre. Pra, vërtetues i asaj që është e vërtetë dhe mohon devijimet e ndryshimet që kanë ndodhur në ta, si dhe është gjykues për ta, duke i shfuqizuar ose konfirmuar.”
 
Kuranit i nënshtrohet çdokush që kapet pas librave të mëparshëm e që nuk ka devijuar. Allahu thotë: “Ata që Ne ua kemi zbritur Librin para tij (Kuranit), i besojnë atij. Kur u lexohet atyre (Kurani), ata thonë: “Ne e besojmë atë. Pa dyshim, ai është e vërteta nga Zoti ynë. Vërtet, Ne edhe para tij kemi qenë të nënshtruar ndaj Zotit.” (El Kasas, 52-53)
 
Allahu i Lartësuar prej njerëzve pranon vetëm fenë që e ka deklaruar në këtë Kuran.
 
Dijetari Abdurrahman Sadi, në lidhje me fjalën e Tij: “... dhe mbizotërues ndaj tyre”, ka thënë: “Ai përmbledh ato që janë përmendur në librat e mëparshëm, si dhe përmend gjëra shtesë në çështjet që kanë të bëjnë me Zotin dhe sjelljet madhore; ai është libër që përmban krejt të vërtetën e përmendur në çdo libër, urdhëron e nxit për të, si dhe ka përmendur rrugë të shumta që të çojnë drejt saj.”
 
Ai është libër që përfshin ngjarjet e të hershmëve dhe të vonshmëve. Ai është libër që përmban dije të thella dhe urtësi. Në të shfaqen dispozitat e librave të mëhershëm, ato për të cilat dëshmon se janë të vërteta, janë të pranuara, ndërsa ato të cilat i refuzon, pa dyshim se ato i ka prekur tjetërsimi dhe devijimi. Përndryshe, nëse do të ishin nga Allahu, nuk do të kishte mundësi t’i kundërshtonte.
 
Kurani famëlartë është mesazhi i fundit për njerëzimin, dërguar nga Allahu. Madje, ai është për njerëzit dhe xhinët, ndryshe nga librat e tjerë qiellorë, të cilët kanë qenë vetëm për një popull e një kohë të caktuar.
 
Një tjetër e vërtetë e rëndësishme është fakti se Kurani është i ruajtur nga shtimi, heqja a tjetërsimi. Allahu i Lartësuar ka garantuar ruajtjen e tij, ku thotë: “Vërtet, Ne e kemi shpallur Rikujtimin dhe Ne do ta ruajmë atë me siguri.” (El Hashër, 9) Rikujtimi është Kurani.
 
Në lidhje me ajetin: “... dhe Ne do ta ruajmë atë me siguri”, komentuesit e Kuranit janë shprehur se ka kuptimin: do ta ruajmë atë prej çdo lloj ndryshimi, qoftë shtesë, qoftë heqje, kështu që askush nuk ka mundësi që të shtojë në të diçka të kotë e as të heqë prej tij diçka të vërtetë.
 
Kurani ka ndikim të theksuar në zemra. Çdokush që e dëgjon atë me vëmendje, do të përjetojë një ndikim të jashtëzakonshëm në vetvete, edhe pse mund të mos i kuptojë argumentet e tij. Madje, ky ndikim shihet edhe tek ata persona që nuk i njohin kuptimet dhe orientimet e tij, madje dhe tek ata që nuk e njohin fare gjuhën arabe, gjë që është një nga sekretet që tregojnë madhështinë e Kuranit.
 
Pa dyshim, ky Kuran ka një ndikim të madh edhe në zhvillimin dhe suksesin e popujve, sepse nga popujt arabë pikërisht ai nxori dijetarë e mendimtarë dhe i bëri ata popullin më të mirë të dalë ndër njerëz, pasi qenë zhytur në errësirën e injorancës.
 
Nga veçoritë e Kuranit mund të përmendim faktin se ai përmban gjykimet më të drejta, më madhështore, më fisnike dhe më gjithëpërfshirëse. Ai nuk ka lënë asgjë të vogël e të madhe pa përfshirë, qoftë në mënyrë të përgjithësuar, qoftë në detaje. Këtë e dëshmon çdokush që është i logjikshëm dhe i paanshëm, edhe në qoftë jomusliman.
 
Për më tepër rreth pozitës dhe madhështisë së Kuranit do të flasim në temat e mëposhtme, sidomos kur të trajtojmë mrekullinë e Kuranit.


Tezkije.com - Nuk lejohet shpërndarja ose/dhe ripublikimi i materialeve pa cekur burimin.
Shko tek kryefaqja